Soledad
¡Ay de la fonte serrana!
¡Ay del penosu llugar,
qué sola ta la quintana!
Ya les mucines non van cortexar,
curre que curre, camín de la fonte,
onde se xunten, allegres, so’l monte
tan que les vieyes encarnen el llar.
Ya na quintana, detrás la llabor,
fala que fala, la xente non posa
de la que vida fo’ntós llaboriosa
y hoy non ye cosa que triste dolor.
Ya, mien que se oi la pipera ruxir,
friega que friega les fresques ferrades,
non canten, non, nin cortexen sentades
hasta que entaina la lluna a llucir.
Nin les esquiles que marquen el son,
dale que dale, del pasu l’hacienda,
nin los que lleguen de fer la mulienda,
nin la collecha que taba’n sazón.
Nada nin nadie de’ntós se ve ya…
¡Ay de la fonte serrana!
¡Quintana de soledá!
José Manuel González Fernández-Valles, dedicó este poema a la fuente y al lavadero, que se encuentra, junto a la casa en la que nació.
José Manuel González Fernández-Valles, dedicó esti poema a la fonte y al llavaderu, que s’alcuentra xunto a la casa na que ñació.